Ho Chi Minh City
ផានធៀត គឺជាទីក្រុងខេត្តនៃខេត្តប៊ិញធួន ដែលជាខេត្តឆ្នេរសមុទ្រស្ថិតនៅភាគកណ្តាលខាងត្បូងនៃប្រទេសវៀតណាម។ ទីនេះជាទីក្រុងកំពង់ផែដែលមានកំពង់ផែដ៏រស់រវើក។ ទូកដែលមានពណ៌ឆើតឆាយអណ្តែតលើផ្ទៃទឹក រង់ចាំដឹកអ្នកនេសាទក្នុងស្រុកចេញទៅសមុទ្រ។ នៅព្រឹកព្រលឹម ផលនេសាទប្រចាំថ្ងៃត្រូវបានស្រង់ចេញពីសំណាញ់ដ៏ធំ ហើយដឹកជញ្ជូនទៅកាន់ផ្សារ ដែលនៅទីនោះ ស្រ្តីៗយ៉ាងរវៀសរវៃបានទិញលក់គ្រឿងសមុទ្រស្រស់ៗរស់ៗយ៉ាងច្រើនសន្ធឹកសន្ធាប់ចេញពីធុង ចំពេលមានសំឡេងតថ្លៃ និងការជជែកកម្សាន្ត។
ផានធៀត ល្បីល្បាញដោយសារគ្រឿងសមុទ្រគ្រប់ប្រភេទ រួមទាំងទឹកត្រីផងដែរ ប៉ុន្តែទឹកត្រីមាសរាវដែលមានក្លិនឈ្ងុយប្លែកនោះ គឺអ្នកគួរតែស្វែងរកនៅភូកុក (Phu Quoc)។ ក្នុងនាមជាច្រកចូលទៅកាន់តំបន់ទេសចរណ៍ឆ្នេរសមុទ្រមុយណេ (Mui Ne) អ្នកធ្វើដំណើរជាច្រើនគ្រាន់តែឆ្លងកាត់ទីក្រុងផានធៀតប៉ុណ្ណោះ។ ប៉ុន្តែ សូមកុំភ្លេចឈប់សម្រាកយ៉ាងហោចណាស់មួយថ្ងៃ ដើម្បីរីករាយជាមួយមុខម្ហូបក្នុងស្រុកដ៏ឈ្ងុយឆ្ងាញ់ជាច្រើនដែលត្រូវបានចម្អិនថ្មីៗនៅក្នុងក្រុង។ នៅជិតស្ពានត្រឹនហ៊ុងដាវ (Tran Hung Dao) មានជួរហាងអាហារសមុទ្រដែលបម្រើជូននូវសត្វសមុទ្រគ្រប់ប្រភេទតាមគ្រប់វិធីចម្អិនដែលអ្នកអាចស្រមៃដល់។ ជ្រើសរើសអាហារល្ងាចដែលកំពុងហែលនៅក្នុងទូកញ្ចក់ រួចគិតលុយតាមទម្ងន់ មុនពេលជ្រើសរើសរចនាប័ទ្មនៃការចម្អិន។ សាកល្បងមុខម្ហូបចម្រុះ – ខជាមួយខ្ញីនិងគល់ស្លឹកគ្រៃ, ឆាជាមួយអំពិលទុំ, ឬអាំងជាមួយខ្ទឹមស – មុននឹងសម្រេចចិត្តលើមុខម្ហូបដែលអ្នកចូលចិត្តបំផុត។
ទោះបីជាគ្រប់មុខម្ហូបទាំងអស់សុទ្ធតែឆ្ងាញ់ក៏ដោយ នេះគឺជាមគ្គុទ្ទេសក៍សម្រាប់មុខម្ហូបល្បីៗដែលមិនអាចរំលងបានមួយចំនួនរបស់ខេត្តប៊ិញធួន។ កុំរំលងដោយមិនបានសាកល្បងម្ហូបពិសេសទាំងនេះឱ្យសោះ។
ជំពូក 01 —
Banh Re Phan Thiet / នំរ៉េផានធៀត
ប្រភព៖ អ៊ីនធឺណិត
Banh re ឬ "នំរ៉េ" គឺជា នំផ្អែមនិងស្រួយដែលធ្វើពីដំឡូងជ្វា ឬដំឡូងមី លាយជាមួយស្ករស។ វាគឺជាមុខម្ហូបពិសេសដ៏ល្បីល្បាញបំផុតមួយនៃទីក្រុងផានធៀត។ ទោះបីជា Banh re មានដើមកំណើតនៅខេត្តនិញធួន (Ninh Thuan) ហើយត្រូវបានលក់នៅទីក្រុងហូជីមិញនាពេលបច្ចុប្បន្ននេះក៏ដោយ វាត្រូវបានគេទទួលស្គាល់យ៉ាងទូលំទូលាយថា គ្មានកន្លែងណានៅក្នុងប្រទេសដែលធ្វើ banh re បានឆ្ងាញ់ដូចខេត្តប៊ិញធួននោះទេ។ មនុស្សម្នាធ្វើដំណើរមកពីគ្រប់ទិសទីនៃប្រទេសដើម្បីទិញវានៅខេត្តប៊ិញធួន និងយកត្រឡប់ទៅផ្ទះវិញធ្វើជាកាដូ។
អាហារសម្រន់នេះហាក់ដូចជាសាមញ្ញណាស់ ដោយមានគ្រឿងផ្សំតែពីរបីមុខប៉ុណ្ណោះ ប៉ុន្តែវាត្រូវការជំនាញ និងបទពិសោធន៍យ៉ាងច្រើនដើម្បីផលិត banh re ដែលមានរសជាតិឆ្ងាញ់ពិតប្រាកដ។ មើមដំឡូងដែលប្រើត្រូវតែជ្រើសរើសដោយប្រុងប្រយ័ត្នម្នាក់ៗ និងពិនិត្យមើលភាពស្រស់ ភាពផ្អែម និងអាយុកាលរបស់វា។ បន្ទាប់ពីជ្រើសរើសមើមដំឡូងរួច គេយកវាទៅកែច្នៃ និងឈូសជាសរសៃ លាយជាមួយស្ករ ហើយបំពងរហូតដល់មានជាតិឈ្ងុយឆ្ងាញ់ និងស្រួយនៅខាងក្រៅ ប៉ុន្តែទន់ និងស្វិតនៅខាងក្នុង។
រីករាយជាមួយវាជាអាហារសម្រន់សាមញ្ញ ហើយកុំភ្លេចទិញមួយកញ្ចប់យកទៅផ្ទះធ្វើជាកាដូអនុស្សាវរីយ៍។ វាត្រូវបានលក់ និងមានរសជាតិឆ្ងាញ់ពិសានៅគ្រប់ពេលនៃថ្ងៃ ប៉ុន្តែរសជាតិ និងវាយនភាពរបស់វាពិតជាលេចធ្លោខ្លាំងនៅពេលញ៉ាំជាមួយតែជូរក្តៅៗមួយកែវនៅថ្ងៃធាតុអាកាសត្រជាក់។
ប្រភព៖ អ៊ីនធឺណិត
ជំពូក 02 —
Cha Ca Phan Thiet / ប្រហិតត្រីផានធៀត
ប្រភព៖ អ៊ីនធឺណិត
Cha ca ឬប្រហិតត្រី គឺជាមុខម្ហូបពិសេសដ៏ល្បីល្បាញរបស់វៀតណាម ដែលត្រូវបានចម្អិនកាន់តែឆ្ងាញ់ពិសានៅខេត្តប៊ិញធួន។ ពួកវាត្រូវបានធ្វើឡើងពីសាច់ត្រីបោះឆ្អឹងផ្សេងៗគ្នា ប្រលាក់គ្រឿងទេស ហើយបន្ទាប់មកយកទៅបំពង ចំហុយ ឬស្ងោរ។ ពួកវាមានរសជាតិជាតិត្រី និងឈ្ងុយឆ្ងាញ់ ប៉ុន្តែមានក្លិនក្រអូប និងរសជាតិចម្រុះយ៉ាងផ្ចិតផ្ចង់ដែលគួរឱ្យភ្ញាក់ផ្អើល។
ជំនួសឱ្យការញ៉ាំតែឯង Cha ca ជាទូទៅត្រូវបានញ៉ាំជាមួយស៊ុប និងមុខម្ហូបមី ឬគុយទាវ។ Banh canh cha ca ឬស៊ុបប្រហិតត្រី គឺជាជម្រើសដ៏ទាក់ទាញបំផុតនៅផានធៀត។ ទឹកស៊ុបធ្វើពីឆ្អឹងជ្រូក ត្រី និងផ្សិត ដោយមានគុយទាវអង្ករ និងគ្រឿងបន្ថែមដូចជាពងក្រួច ញ៉ាំជាមួយប្រហិតត្រី។ អ្នកលក់ផ្សេងៗគ្នានឹងផ្តល់ជូននូវគ្រឿងបន្ថែម និងជម្រើសប្រហិតត្រីខុសៗគ្នា។ បន្ថែមម្ទេសស្រស់តាមចំណូលចិត្ត – មនុស្សភាគច្រើននៅខេត្តប៊ិញធួនចូលចិត្ត banh canh cha ca ហឹរគួរសម។ ជ្រលក់នំប៉័ងស្រួយមួយដុំចូលទៅក្នុងទឹកស៊ុបខាប់ ដើម្បីទទួលបានអាហារថ្ងៃត្រង់តាមបែបប៊ិញធួនពិតប្រាកដ។
ជំពូក 03 —
Banh Can / នំគ្រក់អង្ករ
ប្រភព៖ អ៊ីនធឺណិត
Banh Can គឺជាមុខម្ហូបពិសេសនៅភាគខាងត្បូងប្រទេសវៀតណាម ដែលពេលខ្លះត្រូវបានគេពណ៌នាថាជា "នំគ្រក់អង្ករ"។ ភាពខុសគ្នារវាង banh can និងមុខម្ហូបស្រដៀងគ្នាផ្សេងទៀតដូចជា banh xeo ឬ banh beo បង្ហាញយ៉ាងច្បាស់ពីភាពសម្បូរបែបនៃម្ហូបអាហារវៀតណាម ដែលតំបន់ខុសគ្នាប្រើប្រាស់គ្រឿងផ្សំដូចគ្នា និងរចនាប័ទ្មចម្អិនស្រដៀងគ្នា ដើម្បីបង្កើតបានជាមុខម្ហូបខុសៗគ្នាទាំងស្រុង។
ប្រភព៖ អ៊ីនធឺណិត
Banh Can គឺជា នំគ្រក់ម្សៅអង្ករតូចៗស្រួយៗ។ ម្សៅអង្កររាវត្រូវបានចាក់ចូលទៅក្នុងពុម្ពដីឥដ្ឋដូចជាថាសនំខេកសំប៉ែត។ នៅពេលដែលម្សៅឆ្អិន នំនីមួយៗត្រូវបានរ៉ាយសាច់ បង្គា ឬមឹក ព្រមទាំងស្លឹកខ្ទឹមបំពង ដែលបន្ទាប់មកក្លាយជាស្រទាប់ស្រួយនៅខាងលើ។ ហាងអាហារផ្សេងៗគ្នាបម្រើ banh can ជាមួយទឹកជ្រលក់ និងគ្រឿងបន្ថែមខុសៗគ្នា ចាប់ពីផ្លែស្ពឺ និងស្វាយចិញ្ច្រាំ រហូតដល់ត្រីខ និងប្រហិតសាច់។
ជំពូក 04 —
ស្រាទំពាំងបាយជូរនៅរោងចក្រស្រា RD
ប្រភព៖ អ៊ីនធឺណិត
ទោះបីជាស្រាទំពាំងបាយជូរជាទូទៅត្រូវបានគេគិតថាជាម្ហូបពិសេសរបស់ដាឡាត់ - ប្រសិនបើវាត្រូវបានផ្សារភ្ជាប់ជាមួយនឹងប្រទេសវៀតណាមនោះ - ផានធៀតបានបង្កើតឈ្មោះសម្រាប់ខ្លួនវាថាជាទីក្រុងស្រាពិតប្រាកដ។ បទពិសោធន៍ស្រារបស់ប៊ិញថួនគឺផ្តោតលើ RD Winery ដែលជាប្រាសាទស្រាបំផុសគំនិតដោយ Napa Valley នៃរដ្ឋកាលីហ្វ័រញ៉ា ដែលលាតសន្ធឹងលើផ្ទៃដីជាង ១២.០០០ ហិកតា។
ប្រាសាទនេះត្រូវបានសាងសង់ឡើងជាមួយនឹងស្ថាបត្យកម្មអឺរ៉ុបបុរាណ ហើយរួមបញ្ចូលទាំងលានកណ្តាលដ៏ធំ ដំបូលលំហ និងប៉មដែលមានទិដ្ឋភាពមើលឃើញជុំវិញ។ វាត្រូវបានបែងចែកជាបីជាន់។ ជាន់លើដំបូលមានសារមន្ទីរ តំបន់ទិញទំនិញ សួនផ្កាអ័រគីដេ ព្រមទាំងបារ និងហាងកាហ្វេដែលមានទេសភាពស្រស់ស្អាត។ ជាន់ផ្ទាល់ដីផ្តល់ជូននូវការភ្លក់ស្រា និងផ្សារស្រា។ ជាន់ក្រោមដីជាកន្លែងពិព័រណ៍សម្រាប់ស្រាដបខុសៗគ្នា ២០.០០០ ដបដែលរក្សាទុកនៅទីនេះ។
ប្រភព៖ អ៊ីនធឺណិត
គ្រឿងផ្សំដើមសម្រាប់ស្រាត្រូវបាននាំចូលពីចម្ការទំពាំងបាយជូរ Napa Valley ហើយបន្ទាប់មកត្រូវបានកែច្នៃនៅទីនេះក្នុងក្រុង ផានធៀត។ ភ្ញៀវទេសចរមកកាន់ RD Winery នឹងអាចទស្សនាដំណើរការផលិតស្រានៅទីនេះ ហើយបន្ទាប់មកភ្លក់រសជាតិផលិផលស្រា។ ទោះបីជាទំពាំងបាយជូរសម្រាប់ផលិតស្រាត្រូវបាននាំចូលក៏ដោយ ក៏ទំពាំងបាយជូរជាង ១៣ ប្រភេទផ្សេងៗគ្នាត្រូវបានដាំដុះនៅទីនេះ រួមទាំងពូជដែលប្រើសម្រាប់ Cabernet Sauvignon, Chenin Blanc និង Syrah ។
ក្នុងអំឡុងរដូវប្រមូលផល អ្នកអាចធ្វើការជាមួយអ្នកថែសួន និងប្រមូលផលទំពាំងបាយជូរសម្រាប់ផលិតស្រា សិក្សាអំពីការកម្ចាត់សត្វល្អិត ការដាក់ជី និងលក្ខខណ្ឌដែលធ្វើឱ្យទំពាំងបាយជូរដ៏ល្អក្លាយជាស្រាដ៏អស្ចារ្យ។ ក្នុងគ្រប់រដូវកាល វាពិតជាសែនរីករាយក្នុងការដើរកម្សាន្តកាត់តាមសួនច្បារនៃ "ដែនដីស្រា" ក្នុងប្រទេសវៀតណាម។
