មគ្គុទ្ទេសក៍ស្វែងយល់ពីបុរាណដ្ឋានរាជធានី Thăng Long

ចេញពីតូបលក់សំបុត្រ សូមដើរឆ្លងកាត់វាលស្មៅ និងសួនផ្កាដើម្បីទៅដល់ Đoan Môn (ទ្វារធំ) ដែលជាច្រកចូលផ្លូវការទៅកាន់រាជធានីបុរាណ។ លើក្លោងទ្វារកណ្តាលនៃទ្វារធំមានប៉មសង្កេតការណ៍កម្ពស់ពីរជាន់ ដែលផ្តល់នូវទិដ្ឋភាពដ៏អស្ចារ្យនៃបរិវេណទាំងមូល រួមទាំងប៉មទង់ជាតិហាណូយ (Ha Noi Flag Tower) ផងដែរ។ អ្នកអាចស្វែងរកក្បឿងដែលបានជីកកាយរកឃើញពីរជ្ជកាល Lý, Trần និង Lê តម្រៀបលើគ្នានៅជើងទ្វារ ហើយសាកមើលថាតើអ្នកអាចបែងចែកវាដាច់ពីគ្នាបានដែរឬទេ។

ធ្លាប់ជាទីកន្លែងសម្រាប់រៀបចំពិធីបុណ្យដ៏ខ្ពង់ខ្ពស់បំផុតនៃរាជធានី បច្ចុប្បន្នព្រះបរមរាជវាំង Kính Thiên ស្ថិតនៅចំកណ្តាលទីតាំងនេះ ដោយសល់តែជណ្តើរនាគថ្ម និងគ្រឹះប៉ុណ្ណោះដែលនៅគង់វង្ស។ ព្រះបរមរាជវាំងនេះត្រូវបានសាងសង់ឡើងដោយព្រះមហាក្សត្រនៃរជ្ជកាល Lê ហើយធ្លាប់ជាកន្លែងទទួលស្វាគមន៍អគ្គរាជទូតបរទេស និងរៀបចំពិធីបុណ្យសាសនា មុនពេលត្រូវបានបំផ្លាញដោយអាណានិគមនិយមបារាំង។ នៅពេលអ្នកមកដល់ទីនេះ សូមទស្សនាក្បាលនាគយ៉ាងយកចិត្តទុកដាក់ ដើម្បីមើលឱ្យកាន់តែជិតនូវសិល្បៈចម្លាក់ដើមរជ្ជកាល Lê។

នៅក្នុងការជីកកាយបុរាណវិទ្យាដ៏ធំបំផុតមិនធ្លាប់មានរបស់ប្រទេសវៀតណាម តំបន់នៅផ្លូវ ១៨ Hoàng Diệu បានរកឃើញបុរាណវត្ថុដ៏អស្ចារ្យរាប់ពាន់ដែលមានតាំងពីសតវត្សទី ៧។ សសរថ្ម អណ្តូងបុរាណ ក្បឿង គ្រឿងលម្អដំបូល និងកុលាលភាជន៍ ត្រូវបានរកឃើញពាសពេញផ្ទៃដី ៤៥,០០០ ម៉ែត្រការ៉េ។ សូមដើរកម្សាន្តតាមផ្លូវដើរដែលមានមែកឈើបាំងម្លប់ ដើម្បីទស្សនាវត្ថុបុរាណដ៏កាត់ថ្លៃមិនបានទាំងនេះ។ នៅរដូវក្តៅ សូមសម្រាកកាយនៅក្បែរស្រះឈូក ហើយថតរូបពីរប្រាំសន្លឹកជាមួយផ្កាឈូកដែលកំពុងរីកស្កុសស្កាយយ៉ាងស្រស់ស្អាត។ 

បណ្ដាំ៖ នៅជិតទីតាំងជីកកាយ អ្នកនឹងឃើញមាន Civie Coffee ដែលជាហាងកាហ្វេក្រៅផ្ទះបម្រើកាហ្វេវៀតណាមដ៏ឆ្ងាញ់ពិសានៅក្រោមដើមឈើបុរាណ។

សំបុត្រចូលទស្សនារបស់អ្នកទៅកាន់បុរាណដ្ឋានរាជធានី Thăng Long អនុញ្ញាតឱ្យអ្នកចូលមើលពិព័រណ៍សិល្បៈដែលផ្តល់ព័ត៌មានយ៉ាងលម្អិតបំផុតមួយចំនួននៅក្នុងរាជធានី។ អ្នកនឹងឃើញពិព័រណ៍ទាំងនោះត្រូវបានរៀបចំឡើងនៅក្នុងអគារប្រវត្តិសាស្ត្រនៅពីក្រោយទ្វារធំ។ អ្នកស្រឡាញ់សិល្បៈ និងអ្នករចនាក្រាហ្វិកនឹងពេញចិត្តចំពោះការរៀបចំពិព័រណ៍គំនូរប្រជាប្រិយវៀតណាមចំនួន ៥០ ស្នាដៃ ដែលគ្របដណ្តប់លើរចនាប័ទ្មចម្រុះមកពីទូទាំងប្រទេស។ ពិព័រណ៍មួយបង្ហាញពីបំណែកដីឥដ្ឋ និងដីដុតដែលបានរកឃើញក្នុងអំឡុងពេលជីកកាយ តាមលំដាប់លំដោយកាលប្បវត្តិ។ ពិព័រណ៍មួយទៀតបង្ហាញពីកុលាលភាជន៍ដ៏ផ្ចិតផ្ចង់ និងល្អឯកពីរជ្ជកាល Lê។ សូមចំណាយពេលស្វែងយល់ និងកោតសរសើរឱ្យបានពេញលេញនូវស្នាដៃសិល្បៈបុរាណដ៏កម្រទាំងនេះ។

នៅឆ្នាំ ១៩៦៧ ក្រសួងការពារជាតិនៃប្រទេសវៀតណាមបានសាងសង់ទីបញ្ជាការរបស់ខ្លួននៅក្នុងបរិវេណបុរាណដ្ឋានរាជធានី Thăng Long ដើម្បីរៀបចំការប្រជុំកម្រិតខ្ពស់ និងផ្តល់កន្លែងធ្វើការសម្រាប់ឧត្តមសេនីយ៍យោធានៅទីក្រុងហាណូយ។ អគារ D67 គឺជាទីតាំងទំនាក់ទំនងដ៏សំខាន់នៅក្នុងឆ្នាំដែលឈានទៅរកឯករាជ្យភាពរបស់ប្រទេសវៀតណាម។ អ្នកនឹងឃើញការិយាល័យរបស់លោកឧត្តមសេនីយ៍ប្រវត្តិសាស្ត្រ Võ Nguyên Giáp នៅទីនេះ។ សូមចុះទៅជាន់ក្រោមដីដើម្បីទស្សនាឧបករណ៍ទំនាក់ទំនងសម្ងាត់បំផុតដែលបានប្រើប្រាស់ក្នុងអំឡុងសង្គ្រាម។

ចង់បានគំនិតធ្វើដំណើរនៅវៀតណាមបន្ថែមទៀតទេ? ចុះឈ្មោះទទួលព្រឹត្តិបត្រព័ត៌មានរបស់យើង ដើម្បីទទួលបានអត្ថបទល្អៗបំផុតរបស់យើងនៅក្នុងសារអេឡិចត្រូនិករបស់អ្នក។