កោះ Cu Lao Cau: ឋានសួគ៌ធម្មជាតិដ៏បរិសុទ្ធ

ស្ថិតនៅក្នុងខេត្ត Binh Thuan (ភាគខាងត្បូងប្រទេសវៀតណាម) អ្នកទេសចរអាចជ្រើសរើសធ្វើដំណើរទៅកាន់ Cu Lao Cau ពី៖ Phuoc, Lien Huong ឬ Ca Na (អ្នកអាចធ្វើដំណើរទៅកាន់កំពង់ផែទាំងនេះពីទីក្រុងហូជីមិញ តាមរយៈរថយន្តក្រុង អាល់តាក់ស៊ី រថភ្លើង រថយន្ត ឬម៉ូតូ)។ ដោយសារតែមិនមាន "កំពង់ចត" ត្រឹមត្រូវនៅលើកោះនោះទេ ទូកដឹកអ្នកដំណើរត្រូវចតនៅជិតនោះ ខណៈដែលអ្នកផ្សងព្រេងត្រូវជិះទូកកែវ ឬទូកក្អមរាងមូលតូចៗ ដែលពេញនិយមក្នុងចំណោមអ្នកនេសាទវៀតណាមតាំងពីយូរយារណាស់មកហើយ (មានព័ត៌មានបន្ថែមអំពីការធ្វើដំណើរទៅកាន់កោះនេះនៅផ្នែកខាងក្រោយនៃអត្ថបទនេះ)។

Cu Lao Cau គឺជាទីគាប់ចិត្តរបស់អ្នកដើរព្រៃ និងជាឋានសួគ៌របស់អ្នកមុជទឹកមើលផ្កាថ្ម។ ឆ្នេរខ្សាច់ពណ៌ស ទឹកសមុទ្រថ្លាដូចកញ្ចក់ ថ្មកំបោរដែលមានពណ៌ និងរូបរាងចម្រុះ ព្រមទាំងភ្នំរូងដ៏គួរឱ្យទាក់ទាញក្នុងការរុករក។ លើសពីនេះ ក៏មានប្រជុំផ្កាថ្មដ៏ធំល្វឹងល្វើយដែលមានផ្កាថ្មរាប់រយប្រភេទផងដែរ។ សរុបមក៖ ទោះបីជា Cu Lao Cau អាចមិនសមស្របសម្រាប់មនុស្សគ្រប់គ្នាក៏ដោយ ប៉ុន្តែអ្នកធ្វើដំណើរដ៏ក្លាហាននឹងរកឃើញថាវាជាពិភពអច្ឆរិយៈដ៏ទាក់ទាញសម្រាប់អ្នកស្រឡាញ់ធម្មជាតិ។ 

កោះនេះមានឆ្នេរខ្សាច់ជាច្រើន ហើយនៅពេលទឹកស្រក ឆ្នេរសមុទ្រត្រូវបានគ្របដណ្តប់ដោយសំបកខ្យងលេចឡើងយ៉ាងព្រោតព្រាត — ប្រៀបដូចជាផ្ទាំងគំនូរពណ៌ចម្រុះ។ ហើយអ្នកនឹងកត់សម្គាល់ឃើញថា នៅពេលព្រះអាទិត្យផ្លាស់ប្តូរទីតាំងនៅលើមេឃ ពណ៌សម្បុររបស់កោះនេះក៏ផ្លាស់ប្តូរទៅតាមនោះដែរ ដោយផ្តល់នូវទិដ្ឋភាពដ៏អស្ចារ្យគួរឱ្យប្លែកភ្នែក។ 

កោះនេះមានអគ្គិសនីប្រើប្រាស់ពីថាមពលពន្លឺព្រះអាទិត្យប៉ុណ្ណោះ គ្មានសណ្ឋាគារទេ (អ្នកអាចបោះតង់បាន) និងមានអណ្តូងទឹកសាបតែមួយគត់ ឈ្មោះថា អណ្តូង Gia Long។ មានសេវាកម្មទេសចរណ៍ (ស្ទូចត្រី ជិះទូកកាយ៉ាក់ មុជទឹកមើលផ្កាថ្ម ដើរព្រៃ) និងថែមទាំងមានហាងអាហារពីរបីកន្លែងផងដែរ (ប្រសិនបើអ្នកមិនចង់ចម្អិនគ្រឿងសមុទ្រស្រស់ៗដែលអ្នកស្ទូចបានដោយខ្លួនឯង)។ Cu Lao Cau ពិតជាកន្លែងសម្រាប់ការរស់នៅបែបសាមញ្ញ និងផ្សងព្រេង សម្រាប់អ្នកដែលប៉ងប្រាថ្នាចង់ត្រឡប់ទៅរកធម្មជាតិ។ ការកម្សាន្តក្នុងមួយថ្ងៃត្រូវបានណែនាំ ទោះជាយ៉ាងណាក៏ដោយ អ្នកផ្សងព្រេងអាចបោះតង់សម្រាកលំហែកាយនៅពេលយប់បាន។

_{ប្រភព៖ Instagarm - soi_loi_nhoi}

កោះនេះក៏ជាកន្លែងប្រារព្ធពិធីបុណ្យប្រពៃណីបុរាណប្រចាំឆ្នាំ ដែលគួរតែមកទស្សនាផងដែរ។ រៀងរាល់ឆ្នាំ នៅថ្ងៃពេញបូណ៌មីខែមេសា អ្នកនេសាទតែងតែមកជួបជុំគ្នានៅវិហារដ៏ពិសិដ្ឋនៃព្រះ Nam Hai។ នៅទីនេះ ប្រជាជនបន់ស្រន់ចំពោះ "ត្រី Ong" (ព្រះនៃសមុទ្ររបស់ពួកគេ) ដើម្បីសុំឱ្យសមុទ្រមានខ្យល់ស្ងប់ ទទួលបានផលនេសាទច្រើន និងសុវត្ថិភាពដល់អ្នកធ្វើដំណើរតាមសមុទ្រ។ ពិធីបុណ្យនេះពិតជាអបអរសាទរចំពោះជីវិតជំនឿផ្លូវចិត្តនៃសមុទ្រ។ ប្រសិនបើអ្នកមិនអាចចូលរួមពិធីបុណ្យបានទេ ការទៅទស្សនាវិហារនេះក៏ជាបទពិសោធន៍ដ៏មានតម្លៃដែរ។ 

ក៏មានឱកាសចុះឈ្មោះក្នុងកម្មវិធីដែលហ្វឹកហាត់អ្នកទេសចរអំពីជំនាញសង្គ្រោះអណ្តើកសមុទ្រផងដែរ។ កោះ Cu Lao Cau យកចិត្តទុកដាក់យ៉ាងខ្លាំងចំពោះការការពារពូជសត្វដែលជិតផុតពូជនេះ (ដូចដែលពួកគេការពារប្រព័ន្ធអេកូឡូស៊ីទាំងមូលនៃកោះដ៏មានតម្លៃរបស់ពួកគេ)។ នេះជាឱកាសសម្រាប់អ្នកទេសចរក្នុងការទទួលបានបទពិសោធន៍ផ្ទាល់ជាមួយប្រជាជននៅលើកោះ និងសត្វព្រៃនៅទីនោះ។

អ្នកទេសចរអាចរីករាយជាមួយម្ហូបសមុទ្រ ដោយសារ Cu Lao Cau ផ្តល់ជូននូវគ្រឿងសមុទ្រស្រស់ៗយ៉ាងច្រើនសន្ធឹកសន្ធាប់ ព្រមទាំងមុខម្ហូបពិសេសប្រចាំតំបន់ផងដែរ។ ម្ហូបមួយក្នុងចំណោមមុខម្ហូបប្លែកបំផុតគឺសត្វខ្យងសមុទ្រម្យ៉ាងហៅថា៖ “Ốc Vú Nàng (Cellana)”។ ដោយមិនមានរូបរាងដូចខ្យងធម្មតានោះទេ គ្រឿងសមុទ្រដ៏ឆ្ងាញ់ពិសានេះត្រូវបានយកទៅធ្វើជាមុខម្ហូបជាច្រើនប្រភេទ។ មានតែទីតាំងមួយចំនួនតូចប៉ុណ្ណោះនៅក្នុងប្រទេសវៀតណាម (ឬនៅលើពិភពលោក) ដែលអាចស្វែងរកឃើញខ្យងប្រភេទនេះ។

_{ប្រភព៖ Instagarm - go_and_feel}

ក្តាមព្រះច័ន្ទ (Moon Crab) គឺជាសត្វសំបកទន់ដ៏កម្រមួយ។ វា មិនសូវសំបូរ និងពិបាកចាប់ណាស់ ប៉ុន្តែវាជាម្ហូបពិសេសប្រចាំកោះ។ Cui So គឺជាមុខម្ហូបពិសេសមួយទៀត។ ម្ហូបលាសសមុទ្រនេះត្រូវបានចម្អិនជាមួយសណ្តែកដីបុក និងគ្រឿងទេសពិសេសប្រចាំកោះ។ គ្រំអាំងក៏ពេញនិយមផងដែរ (តាមពិតទៅ មុខម្ហូបជាច្រើនត្រូវបានចម្អិនតាមរបៀបអាំងលើចង្រ្កាន)។ ម្ហូបឆ្ងាញ់ៗទាំងនេះមានភាពចម្រុះយ៉ាងខ្លាំង ហើយសុទ្ធតែជាគ្រឿងសមុទ្រស្រស់ៗចេញពីផ្ទៃទឹកជុំវិញកោះ។ អ្នកទេសចរក៏ត្រូវបានលើកទឹកចិត្តឱ្យស្ទូចត្រីធ្វើជាអាហារផ្ទាល់ខ្លួនផងដែរ។ ប្រដាប់ស្ទូចត្រី និងនុយគឺមានត្រៀមជាស្រេច។ 

_{ប្រភព៖ អ៊ីនធឺណិត}

វាជារឿងសំខាន់ដែលត្រូវដឹងថា Cu Lao Cau មិនមែនជាកន្លែងកម្សាន្តដែលអាចទៅបានពេញមួយឆ្នាំនោះទេ។ យ៉ាងណាមិញ លក្ខខណ្ឌអាកាសធាតុដើរតួនាទីយ៉ាងសំខាន់ក្នុងការធ្វើដំណើរទៅកាន់កោះនេះ។ ចាប់ពីខែកុម្ភៈ ដល់ខែកក្កដា គឺជាពេលវេលាដ៏ល្អបំផុតសម្រាប់ការទស្សនា — អាកាសធាតុអំណោយផល រលកសមុទ្រសមស្រប ហើយសកម្មភាពកម្សាន្តនៅលើកោះដំណើរក្តៅគគុក។ មកកម្សាន្តនៅពាក់កណ្តាលខែឧសភា ដើម្បីរីករាយជាមួយពិធីបុណ្យព្រះ Nam Hai (Nam Hai God Festival)។

ដើម្បីទៅដល់កោះនេះ អ្នកត្រូវធ្វើដំណើរពីទីក្រុងហូជីមិញទៅកាន់ខេត្ត Binh Thuan។ ពីទីក្រុងហូជីមិញ មានមធ្យោបាយធ្វើដំណើរជាច្រើនដែលអាចនាំអ្នកទៅកាន់ចំណុចធ្វើដំណើរមួយក្នុងចំណោមចំណុចទាំងបី។ 

កំពង់ផែនេសាទ Ca Na: ការធ្វើដំណើរតាមទូកពីកំពង់ផែទៅកាន់កោះ Cu Lao Cau ប្រើពេលជាងមួយម៉ោងបន្តិច។ 

កំពង់ផែ Lien Huong: ទូកនេសាទ កាណូត ឬអូប័រ គឺជាមធ្យោបាយដឹកជញ្ជូនចេញពីទីនេះ។ ការចេញដំណើរមានប្រភពចេញពីមជ្ឈមណ្ឌលអភិរក្សសមុទ្រ (ដែលគួរតែចូលទស្សនាផងដែរ)។ ការធ្វើដំណើរចំណាយពេលប្រហែល ៤៥ នាទី។  

កំពង់ផែនេសាទ Phuoc The: ចំណាយពេលត្រឹមតែ ៣០ នាទីប៉ុណ្ណោះ ទូកនេសាទជាច្រើនត្រៀមខ្លួនជាស្រេចដើម្បីនាំអ្នកទៅកាន់ឋានសួគ៌នៅលើកោះនេះ។ ជម្រើសមួយទៀតគឺ "ជិះស្ទាក់" លើទូកដឹកជញ្ជូនអាហារ ទឹក និងស្បៀងអាហារទៅកាន់កោះ។ 

Cu Lao Cau គឺជាឋានសួគ៌ដ៏បរិសុទ្ធដែលមិនទាន់មានការប៉ះពាល់។ ប្រជាជនក្នុងតំបន់ និងរដ្ឋាភិបាលបានយកចិត្តទុកដាក់យ៉ាងខ្លាំងក្នុងការការពារ និងថែរក្សាភាពដើមនៃធម្មជាតិរបស់វា។ Cu Lao Cau គឺជាទីតាំងដ៏ពិតប្រាកដសម្រាប់អ្នកធ្វើដំណើរដែលស្រឡាញ់ធម្មជាតិ និងចូលចិត្តការផ្សងព្រេង។