ញ៉ាត្រាង គឺជាទីក្រុងរមណីយដ្ឋានមាត់សមុទ្រមួយ ដែលមានភាពស្ងប់ស្ងាត់ផង និងអ៊ូអរខ្លាំងផងក្នុងពេលតែមួយ ជាកន្លែងសម្រាប់ទាំងការសម្រាកហាលថ្ងៃលំហែកាយ និងការជប់លៀងពេញមួយយប់។ ឆ្នេរសមុទ្រនេះគឺជាឆ្នេរខ្សាច់សរាងដូចព្រះច័ន្ទពាក់កណ្តាលវង់ដ៏ល្បីល្បាញលើពិភពលោក ដែលព័ទ្ធជុំវិញដោយសួនច្បារពណ៌បៃតង និងផ្លូវដើរលំហែ។ នៅពីក្រោយឆ្នេរ អគារខ្ពស់ៗទំនើបៗផ្តល់ជូននូវការទទួលទានអាហារដ៏ប្រណីត និងទិដ្ឋភាពពីលើដំបូលអគារ។ ផ្នែកខាងក្នុងនៃទីក្រុងសំបូរទៅដោយហាងស្រា បារ និងជីវិតរាត្រីដែលស័ក្តិសមសម្រាប់គ្រប់វ័យ និងចំណង់ចំណូលចិត្ត។ 

គ្រឿងសមុទ្រស្រស់ៗរបស់ទីក្រុងនេះ គឺជាការទាក់ទាញដ៏ធំបំផុតមួយរបស់វា។ ញ៉ាត្រាងល្បីល្បាញដោយសារមុខម្ហូបគ្រឿងសមុទ្រពិសេសៗ។ គ្រប់យ៉ាងចាប់ពីត្រី និងក្តាម រហូតដល់ចាហួយសមុទ្រ អាចត្រូវបានចម្អិនជាមុខម្ហូបប្លែកៗរាប់សិបមុខ។ ឆ្ពោះទៅកាន់ភោជនីយដ្ឋានណាមួយ មិនថាជាតូបតាមចិញ្ចើមផ្លូវ ឬភោជនីយដ្ឋានលំដាប់ខ្ពស់ដែលមានក្រាលតុពណ៌ស ដើម្បីជ្រើសរើសត្រីរស់ៗផ្ទាល់ពីធុង។ កុម្ម៉ង់តាមទម្ងន់ រួចអាំងវាដោយខ្លួនឯង ឬជ្រើសរើសទឹកជ្រលក់ និងម្ហូបអមជាច្រើនមុខ មិនថាជាការចំហុយ ឆា ឬស្ងោរក្នុងស៊ុបនោះទេ។ 

ចន្លោះពេលទទួលទានអាហារ សូមកុំភ្លេចចំណាយពេលដើរកម្សាន្តនៅតាមឆ្នេរនានា។ ញ៉ាត្រាងស្ថិតនៅលើឈូងសមុទ្រដែលពោរពេញទៅដោយកោះត្រូពិច។ អ្នកអាចទៅទស្សនាកោះទាំងនេះដោយបង់ថ្លៃសេវា ដែលប្រាក់នោះនឹងត្រូវយកទៅគាំទ្រដល់ការអភិរក្សសត្វព្រៃក្នុងតំបន់។ បើមិនដូច្នោះទេ គ្រាន់តែអង្គុយសម្រាកនៅលើឆ្នេរខ្សាច់ និងគយគន់កោះទាំងនោះនៅពេលដែលព្រះអាទិត្យរៀបលិច។

---

ឆ្នេរល្អបំផុតនៅញ៉ាត្រាង 

ឆ្នេរ ត្រានភូ (Tran Phu)

ឆ្នេរ ត្រានភូ (Tran Phu) គឺជាបេះដូងនៃទីក្រុងនេះ ដែលជាឆ្នេរខ្សាច់ពណ៌លឿងប្រវែង ៧ គីឡូម៉ែត្រ លាតសន្ធឹងកាត់តាមឆ្នេរសមុទ្រដ៏អ៊ូអរ។ ទីតាំងដ៏ល្អឥតខ្ចោះរបស់វាធ្វើឱ្យវាមានភាពមមាញឹក ប៉ុន្តែវាពិតជាសមហេតុផល។ ទឹកសមុទ្រមានភាពថ្លា និងពណ៌ខៀវស្រងាត់ ហើយទោះបីជាឆ្នេរនេះមានការពេញនិយមក៏ដោយ ក៏វាមានប្រវែងវែងល្មមសម្រាប់ឱ្យអ្នកស្វែងរកកន្លែងផ្ទាល់ខ្លួនដើម្បីហាលថ្ងៃដោយស្ងប់ស្ងាត់បានដែរ។ 

សកម្មភាពនានាដូចជា ការមុជទឹក ការលេងស៊ិហ្វ និងការមុជទឹកមើលផ្កាថ្ម គឺមានផ្តល់ជូនសម្រាប់អ្នកដែលចូលចិត្តការកម្សាន្តបែបសកម្ម។ សម្រាប់អ្នកដែលចូលចិត្តការសម្រាកលំហែកាយបែប «ដើរលេងឆ្នេរចន្លោះពេលញ៉ាំអី» គ្រាន់តែដើរកាត់ផ្លូវលំហែ កាត់សួនចម្លាក់ និងរុក្ខជាតិលម្អ ចូលទៅក្នុងភោជនីយដ្ឋាន និងបារក្បែរនោះជាការស្រេច។

 

_{ប្រភព៖ អ៊ីនធឺណិត}

ឆ្នេរ ញូធៀន (Nhu Tien)

ឆ្នេរ ញូធៀន (Nhu Tien) មានចម្ងាយត្រឹមតែ ១០ គីឡូម៉ែត្រប៉ុណ្ណោះពីទីក្រុងញ៉ាត្រាង ប៉ុន្តែវាដាច់ឆ្ងាយពីទីក្រុងទាំងស្រុង។ ឆ្នេរនេះត្រូវបានហ៊ុំព័ទ្ធទៅដោយជួរភ្នំ គឺជាច្រកសមុទ្រឯកជនដ៏ស្ងប់ស្ងាត់ ដែលប្រៀបដូចជាផ្ទាំងគំនូរពណ៌ទឹកនៃផ្ទៃទឹក និងព្រៃឈើលាតសន្ធឹងដាច់កន្ទុយភ្នែក។ 

ភាពជិតនឹងទីក្រុង រួមផ្សំជាមួយនឹងទេសភាពធម្មជាតិដ៏គួរឱ្យភ្ញាក់ផ្អើល ធ្វើឱ្យឆ្នេរ ញូធៀន ប្រហែលជាឆ្នេរដ៏ល្អបំផុតនៅក្នុងទីក្រុងញ៉ាត្រាង។ ក្នុងរយៈពេលមិនដល់ ៣០ នាទីផង អ្នកអាចចាកចេញពីទីក្រុងធំ ដើម្បីទៅកម្សាន្តនៅតាមរូងភ្នំ ផ្ទាំងថ្មធម្មជាតិ និងផ្លូវដើរព្រៃ។ ធ្វើដំណើរទៅកាន់ជ្រោយសមុទ្រដើម្បីទស្សនាថ្ងៃលិចដ៏ស្រស់ស្អាត ហើយត្រឡប់ទៅទីក្រុងវិញដើម្បីក្រេបភេសជ្ជៈពេលរាត្រី។ 

 

ឆ្នេរ បាយដាយ/ឡុងប៊ីច (Bai Dai/Long Beach) 

បើកបរចម្ងាយ ២៥ គីឡូម៉ែត្រទៅភាគខាងត្បូងនៃទីក្រុងញ៉ាត្រាង ដើម្បីទៅដល់សម្រស់ធម្មជាតិបែបព្រៃផ្សៃនៃឆ្នេរ បាយដាយ (Bai Dai) ដែលស្ថិតនៅក្រោមជើងភ្នំពណ៌បៃតង។ ដោយដាច់ឆ្ងាយពីភាពអ៊ូអរនៃទីក្រុងដ៏មមាញឹក ឆ្នេរ បាយដាយ ផ្តល់អារម្មណ៍ធម្មជាតិពិតៗជាងឆ្នេរ ត្រានភូ។ វាជាកន្លែងដ៏ស្ងប់ស្ងាត់មួយ សម្រាប់ជួលកៅអីឆ្នេរ និងសម្រាកលំហែកាយពេញមួយថ្ងៃ។ ភោជនីយដ្ឋានគ្រឿងសមុទ្រមានភាពងាយស្រួលក្នុងការស្វែងរកនៅទីនេះដូចនៅកណ្តាលក្រុងដែរ ប៉ុន្តែគ្មានហ្វូងមនុស្សអ៊ូអរឡើយ។ ប្រសិនបើវាជាថ្ងៃមមាញឹកខ្លាំង ហើយឆ្នេរហាក់ដូចជាមានមនុស្សច្រើនបន្តិច គ្រាន់តែបន្តបើកបរទៅភាគខាងត្បូងបន្ថែមទៀត។ ឆ្នេរនេះលាតសន្ធឹងវែងអន្លាយ ហើយវាគឺជាតំបន់សាធារណៈទាំងអស់។ 

 

ឆ្នេរ ដុកឡិត (Doc Let) 

ចម្ងាយប្រហែល ៤០ គីឡូម៉ែត្រភាគខាងជើងទីក្រុងញ៉ាត្រាង ឆ្នេរ ដុកឡិត (Doc Let) លាក់ខ្លួនដូចជាត្បូងពេជ្រនៅក្នុងឈូងសមុទ្រ វ៉ាន់ផុង (Van Phong) ដែលជាឋានសួគ៌លាក់ខ្លួននៅក្នុងព្រៃឈើ។ ឆ្នេរខ្សាច់សប្រវែង ២.៥ គីឡូម៉ែត្រ លាតសន្ធឹងនៅចំពោះមុខដើមស្រល់ និងព្រៃកាវសួរីណា។ កោះនានាដែលនៅជុំវិញនោះអណ្តែតត្រដែតដូចជាអាថ៌កំបាំងនៅពីចម្ងាយ បន្ថែមភាពទាក់ទាញដល់ផ្ទៃទឹកដ៏ស្ងប់ស្ងាត់នៃឈូងសមុទ្រ។ 

ទឹកសមុទ្រមានភាពស្ងប់ស្ងាត់ និងរាក់ល្មមដែលអាចឱ្យដើរលេងត្រឹមចង្កេះរាប់រយម៉ែត្រ។ នេះធ្វើឱ្យឆ្នេរ ដុកឡិត ក្លាយជាឆ្នេរដ៏ល្អឥតខ្ចោះសម្រាប់គ្រួសារដែលមានកុមារ ឬមនុស្សចាស់ ក៏ដូចជាសម្រាប់ការហែលទឹក និងជិះទូកកាណូ។ សូមកុំភ្លេចនាំយក ឬជួលវ៉ែនតាមុជទឹក ឬឧបករណ៍មុជទឹកមើលផ្កាថ្ម ព្រោះទឹកសមុទ្រមានភាពថ្លាដូចកញ្ចក់រហូតដល់បាតសមុទ្រ។

 

 

ឆ្នេរ ទ្រូ (Tru Beach)

ឆ្នេរ ទ្រូ (Tru Beach) គឺជាអូអាស៊ីសនៅលើកោះ ហុនត្រេ (Hon Tre) ដែលអាចទៅដល់បានតាមរយៈទូក ស្រឡាង ឬកន្ត្រកខ្សែកាបឆ្លងសមុទ្រដែលវែងជាងគេបំផុតនៅលើពិភពលោក។ ឆ្នេរខ្សាច់សត្រូវបានរក្សាទុកយ៉ាងស្អាតគ្មានសម្រាម ធ្វើឱ្យវាក្លាយជាកន្លែងគេចចេញពីភាពអ៊ូអរដ៏អស្ចារ្យសម្រាប់គ្រួសារ គូស្នេហ៍ និងអ្នកធ្វើដំណើរម្នាក់ឯងដូចគ្នា។ 

ចំណាយពេលមួយរសៀលសាកល្បងមុជទឹកស្វែងរកបង្គានិងមឹកជាមួយអ្នកស្រុក។ ឬ ដើម្បីផ្លាស់ប្តូរសកម្មភាពពីឆ្នេរសមុទ្រ សូមឆ្ពោះទៅកាន់សួនកម្សាន្ត និងអាងចិញ្ចឹមត្រី Vinpearl Land។ មានទូកម៉ាស៊ីនសម្រាប់ជួលដើម្បីធ្វើដំណើរទៅកម្សាន្តតាមកោះក្បែរៗនោះ។

 

 

ភាពប្រណីត និងនិរន្តរភាព៖ Six Senses Ninh Van Bay 

ញ៉ាត្រាងគឺជាកន្លែងប្រមូលផ្តុំទៅដោយរមណីយដ្ឋានប្រណីតៗបំផុតមួយចំនួននៅលើពិភពលោក ដែលរមណីយដ្ឋានខ្លះបានឈ្នះពានរង្វាន់អន្តរជាតិដ៏មានកិត្យានុភាព។ Six Senses Ninh Van Bay ប្រហែលជាកន្លែងដែលលេចធ្លោបំផុតក្នុងចំណោមនោះ។ ស្ថិតនៅចំកណ្តាលឈូងសមុទ្រ Ninh Van Bay, Six Senses គឺប្រៀបដូចជាឋានសួគ៌អេកូឡូស៊ីដ៏ប្រណីតមួយ ដែលត្រូវបានអ្នកជំនាញផ្នែកនិរន្តរភាពកោតសរសើរថាជារមណីយដ្ឋានអេកូឡូស៊ីឈានមុខគេមួយនៅលើពិភពលោក។ 

រមណីយដ្ឋាននេះត្រូវបានបញ្ចូលគ្នាយ៉ាងចុះសម្រុងជាមួយទេសភាពធម្មជាតិ ដោយព័ទ្ធជុំវិញផ្ទាំងថ្មយក្ស និងលាក់ខ្លួននៅក្នុងព្រៃ។ វីឡាទាំងអស់ត្រូវបានសាងសង់ឡើងពីវត្ថុធាតុដើមធម្មជាតិដូចជា ឈើក្រហម និងឫស្សី ហើយរាល់ដើមឈើនីមួយៗដែលត្រូវបានកាប់សម្រាប់ការសាងសង់ ត្រូវបានជំនួសមកវិញដោយកូនឈើថ្មីចំនួនដប់ដើម។ សត្វព្រៃដ៏សម្បូរបែបគឺជាអ្នកជិតខាងដ៏ជិតស្និទ្ធបំផុត ដោយមានសត្វស្វាស្កាម (langurs) កំពុងរងការគំរាមកំហែងរស់នៅក្នុងព្រៃជុំវិញនោះ តាមរយៈកម្មវិធីអភិរក្សរួមគ្នារវាងរមណីយដ្ឋាន និង GreenViet។ 

Six Senses ប្តេជ្ញាចិត្តក្នុងការកាត់បន្ថយការបំភាយឧស្ម័នកាបូន។ អគ្គិសនីទាំងអស់ដែលប្រើប្រាស់គឺបានមកពីបន្ទះសូឡា ហើយមិនមានការប្រើប្រាស់ផ្លាស្ទិចនៅក្នុងបរិវេណរមណីយដ្ឋានឡើយចាប់តាំងពីឆ្នាំ២០២០ មក។ កាកសំណល់អាហារត្រូវបានកែច្នៃទៅជាជីកំប៉ុស សំបកក្រូចត្រូវបានកែច្នៃទៅជាផលិតផលប្រេងក្រអូប ហើយសូម្បីតែកន្សែង និងកម្រាលពូកចាស់ៗក៏ត្រូវបានកែច្នៃទៅជាផើងផ្កា និងគម្របអាហារធ្វើពីក្រមួនឃ្មុំផងដែរ។ 

បរិវេណនេះត្រូវបានព័ទ្ធជុំវិញមិនត្រឹមតែដោយព្រៃធម្មជាតិប៉ុណ្ណោះទេ ប៉ុន្តែថែមទាំងមានសួនបន្លែ និងចម្ការផ្លែឈើដែលដាំផ្លែឈើត្រូពិចតាមរដូវដូចជា ស្វាយ ល្ហុង និងក្រូចថ្លុងផងដែរ។ អាហារភាគច្រើនដែលត្រូវបានរៀបចំនៅក្នុងភោជនីយដ្ឋានគឺត្រូវបានដាំដុះនៅក្នុងបរិវេណផ្ទាល់តែម្តង។ ទឹកផឹកត្រូវបានចម្រោះតាមរយៈប្រព័ន្ធចម្រោះទឹក (reverse osmosis) នៅរមណីយដ្ឋាន និងច្រកក្នុងដបកែវដែលអាចប្រើឡើងវិញបាន។ គ្រាន់តែប្រព័ន្ធនេះតែមួយ ត្រូវបានគេប៉ាន់ប្រមាណថាអាចកាត់បន្ថយដបផ្លាស្ទិចចំនួន ១០,០០០ ដបពីប្រព័ន្ធកាកសំណល់ជារៀងរាល់ខែ។ 

ស្នាក់នៅទីនេះដើម្បីស្វែងយល់បន្ថែមអំពីការប្តេជ្ញាចិត្តរបស់ Six Senses ចំពោះនិរន្តរភាព។ មជ្ឈមណ្ឌលនេះបានរៀបចំយុទ្ធនាការប្រមូលសំរាមពីឆ្នេរខ្សាច់របស់ញ៉ាត្រាង និងផ្តល់សេវាកម្មចម្រោះទឹកដល់សាលាបឋមសិក្សាចំនួនពីរផ្សេងគ្នា ដើម្បីកាត់បន្ថយកាកសំណល់ និងគាំទ្រដល់សុខភាពសាធារណៈ។ 

ហើយជាការពិតណាស់ រមណីយដ្ឋាននេះផ្តល់នូវសេវាកម្មជូនភ្ញៀវដែលស្របទៅនឹងកិច្ចខិតខំប្រឹងប្រែងការពារបរិស្ថានរបស់ខ្លួន។ ចូលរួមក្នុងសកម្មភាពប្រចាំថ្ងៃដូចជា ការជិះទូក ហែលទឹក ការដើរកម្សាន្តព្រៃ និងការជិះកង់ ឬចូលរួមក្នុងថ្នាក់បង្រៀនធ្វើម្ហូប ស្ប៉ា ឬយូហ្គា។

_{ប្រភព៖ អ៊ីនធឺណិត}