កន្លែងដែលត្រូវទៅនៅវៀតណាម៖ មគ្គុទ្ទេសក៍ប្រចាំខែ

ចាប់ផ្តើមឆ្នាំថ្មីជាមួយនឹងការរត់ម៉ារ៉ាតុងដ៏អស្ចារ្យនៅ Mộc Châu។ នៅក្នុងខែមករា ទីក្រុងនៅលើភ្នំមួយនេះប្រែទៅជាដែនដីអស្ចារ្យដូចក្នុងរឿងនិទានដែលគ្របដណ្តប់ដោយផ្កាស៊េរីពណ៌ស។ ការរត់ម៉ារ៉ាតុង Vietnam Trail Marathon រត់យ៉ាងជ្រៅទៅក្នុងភ្នំ ឆ្លងកាត់ចម្ការតែដ៏មានរបៀបរៀបរយ និងចម្ការហូបផ្លែដែលកំពុងរីកស្កឹមស្កៃ។ ស្នាក់នៅ ផ្ទះស្នាក់ជនជាតិភាគតិច ដើម្បីស្វែងយល់បន្ថែមអំពីរបៀបរស់នៅរបស់អ្នកស្រុក និងទទួលទានអាហារដ៏ឈ្ងុយឆ្ងាញ់ដែលធ្វើនៅផ្ទះ។ 

រដូវផ្ការីកមានន័យថាផ្កាកំពុងរីកស្កឹមស្កៃនៅ Đà Lạt។ ផ្កាសាគូរ៉ាពណ៌ស៊ីជម្ពូដុះលម្អតាមដងផ្លូវ និងបឹងបួរនៅតំបន់ខ្ពង់រាបកណ្តាល។ Đà Lạt មានខ្យល់អាកាសត្រជាក់ស្រួលពេញមួយឆ្នាំ ប៉ុន្តែផ្ទៃមេឃក្នុងខែកុម្ភៈ គឺស្ថិតនៅក្នុងចំណោមផ្ទៃមេឃដែលស្រឡះ និងខៀវស្រងាត់បំផុត។ រំលាយអារម្មណ៍ក្នុងធម្មជាតិ និងចំណាយពេលមួយយប់បោះជំរុំនៅក្បែរបឹង Tuyền Lâm ឬរៀបចំការពិកនិកនៅថ្ងៃសម្រាកលើភ្នំ Thiên Phúc Đức។ 

បន្ទាប់ពីមានភ្លៀងធ្លាក់អស់ជាច្រើនខែ Hội An មានភាពស្រស់បំព្រងជាងពេលណាៗទាំងអស់នៅដើមខែមីនា។ ខ្យល់អាកាសបរិសុទ្ធ និងថ្ងៃដែលមានពន្លឺថ្ងៃធ្វើឲ្យការរុករកវាលស្រែ និងទីក្រុងបុរាណក្លាយជាការសប្បាយរីករាយ។ ដើរកាត់ច្រកផ្លូវតូចៗពណ៌លឿង សម្រាកនៅក្នុងហាងតែ ឬជិះកង់ទៅកាន់ឆ្នេរសមុទ្រ។ ប្រសិនបើអ្នកមកដល់ទីនេះចំថ្ងៃពេញបូណ៌មី សូមដើរកម្សាន្តតាមទន្លេ Thu Bồn បន្ទាប់ពីមេឃងងឹត ដើម្បីមើលស្រមោលដ៏អស្ចារ្យនៃព្រះចន្ទ និងគោមនៅលើផ្ទៃទឹក។ 

ពិធីបុណ្យ Huế Festival ដ៏អស្ចារ្យ និងពិធីបុណ្យសិប្បកម្ម Huế Craft Festival ត្រូវបានរៀបចំឡើងផ្លាស់ប្តូរគ្នារៀងរាល់ឆ្នាំនៅចុងខែមេសា ដែលធ្វើឱ្យពេលនេះជាពេលវេលាដ៏ល្អបំផុតក្នុងការទស្សនារាជធានីបុរាណនៃប្រទេសវៀតណាម។ សកម្មភាពនៃពិធីបុណ្យទាំងនេះអបអរសាទរសិល្បៈ វប្បធម៌ និងបេតិកភណ្ឌរបស់ Huế ជាមួយនឹងការសម្តែងដ៏ទាក់ទាញ។ ខែមេសាក៏ជាខែដែលមានអាកាសធាតុល្អឥតខ្ចោះសម្រាប់ Huế ផងដែរ ជាមួយនឹងពន្លឺព្រះអាទិត្យ និងផ្ទៃមេឃស្រឡះ។

ព្រឹត្តិការណ៍ប្រកួតកីឡាបីប្រភេទប្រចាំឆ្នាំដែលរៀបចំឡើងនៅលើផ្ទៃខាងក្រោយដ៏ស្រស់ស្អាតនៃតំបន់ឆ្នេរសមុទ្រ Ironman Vietnam ស្វាគមន៍កីឡាករ និងអ្នកធ្វើដំណើររៀងរាល់ខែឧសភានៅ ទីក្រុង Đà Nẵng។ សម្រាកលំហែកាយបន្ទាប់ពីព្រឹត្តិការណ៍នេះ ដោយទស្សនាតំបន់បេតិកភណ្ឌ Mỹ Sơn Sanctuary និងសារមន្ទីរចម្លាក់ Cham ដើម្បីស្វែងយល់អំពីព្រះរាជាណាចក្រចាមបុរាណ ឬបន្តស្នាក់នៅដើម្បីទស្សនាពិធីបុណ្យបាញ់កាំជ្រួចដ៏អស្ចារ្យក្នុងខែមិថុនា។ 

រដូវក្តៅនៅ ឆូងសមុទ្រ Hạ Long មានន័យថាជាការហាលថ្ងៃនៅលើជាន់ខាងលើនៃកប៉ាល់កម្សាន្ត ការហែលទឹកនៅជុំវិញកោះថ្មកំបោរ និងការញ៉ាំប្រហិតមឹកស្រស់ៗ។ សម្រាកពីពន្លឺព្រះអាទិត្យ ហើយទស្សនាទម្រង់ថ្មដែលមានអាយុកាលរាប់ពាន់ឆ្នាំយ៉ាងជិតស្និទ្ធនៅក្នុងរូងភ្នំជាច្រើននៃ Hạ Long។ ការជិះយន្តហោះសមុទ្រ នឹងផ្តល់ឱ្យអ្នកនូវទិដ្ឋភាពពីលើអាកាសដ៏អស្ចារ្យនៃឆូងសមុទ្រដ៏ល្បីល្បាញនេះ ភូមិបណ្តែតទឹក និងភ្នំថ្មកំបោរដ៏ស្កឹមស្កៃ។ 

ឆ្នេរសមុទ្រនៅភាគកណ្តាលនៃប្រទេសវៀតណាម គឺជាទីកន្លែងក្នុងក្តីស្រមៃក្នុងខែកក្កដាដែលមានពន្លឺថ្ងៃ ជាមួយនឹងផ្ទៃមេឃខៀវស្រឡះ ផ្ទៃទឹកចាំងពន្លឺ និងឆ្នេរខ្សាច់ក្តៅឧណ្ហៗ។ ជិះរថភ្លើង និងតម្រង់ទិសដៅទៅកាន់ Nha Trang សម្រាប់ការសម្រាកលំហែកាយនៅឆ្នេរសមុទ្រយ៉ាងលឿន និងងាយស្រួល។ ការដើរកម្សាន្តតាមកោះនានានៅទីនេះ គឺជាអ្វីដែលមិនអាចរំលងបាន ជាមួយនឹងប្រជុំកោះប៉ប្រះទឹកដែលត្រូវបានការពារ និងឆ្នេរខ្សាច់ដ៏ស្រស់ស្អាត។ មុជទឹកភក់សម្បូរទៅដោយរ៉ែ មុនពេលចេញទៅញ៉ាំអាហារពេលល្ងាចគ្រឿងសមុទ្រនៅក្បែរសមុទ្រ។ 

វាលស្រែកាំជណ្តើរនៅ Sa Pa គ្របដណ្តប់ដោយពណ៌មាសយ៉ាងស្រស់ស្អាតនៅក្នុងខែសីហា នៅពេលដែលដើមស្រូវទុំជ្រុះទម្ងន់។ «រដូវពណ៌មាស» នេះមានភ្លៀងរ៉ឹមៗនៅព្រឹកព្រលឹម និងយប់ជ្រៅ ហើយពេលល្ងាចត្រជាក់ល្មមសម្រាប់ភ្នក់ភ្លើង និងអាហារឆ្នាំងក្តៅយ៉ាងកក់ក្តៅ។ បន្ទាប់ពីការដើរភ្នំពេញមួយថ្ងៃ សូមផ្តល់រង្វាន់ដល់ខ្លួនអ្នកជាមួយនឹងការងូតទឹកឱសថបុរាណ និងសម្រាកនៅផ្ទះស្នាក់ជនជាតិភាគតិច។  

រដូវស្លឹកឈើជ្រុះនៅ Ha Noi គឺស្រស់ស្អាតខ្លាំងណាស់ រហូតមានបទចម្រៀង កំណាព្យ និងរឿងខ្លីវៀតណាមរាប់មិនអស់ត្រូវបានសរសេរឡើងអំពីរាជធានីមួយនេះក្នុងរដូវកាលនេះ។ ហៅស៊ីក្លូជិះកម្សាន្តជុំវិញសង្កាត់ចាស់ (Old Quarter) ស្វែងរកហាងកាហ្វេលាក់ខ្លួនក្នុងវីឡាបារាំង ឬដើរលេងក្រោមស្លឹកឈើជ្រុះ។ ហាណូយក៏ជាកន្លែងដ៏ល្អឥតខ្ចោះដើម្បីប្រារព្ធពិធីបុណ្យជាតិនៅថ្ងៃទី ២ ខែកញ្ញា ដោយមានទង់ជាតិបង្ហោះតាមគ្រប់ដងផ្លូវ។ 

Pù Luông ក្នុងខែតុលា គឺជាជម្រើសដ៏ល្អប្រសិនបើអ្នកចូលចិត្តទស្សនីយភាពបៃតងខ្ចី និងការលម្ហែកាយបែបធម្មជាតិ។ កក់ការស្នាក់នៅក្នុងផ្ទះខ្នងខ្ពស់ដែលបែរមុខទៅរកជ្រលងភ្នំ ហើយភ្ញាក់ដឹងខ្លួនឡើងជាមួយវាលស្រែថ្នាក់ៗដ៏ក្រអូបប្រហើរនៅខាងក្រៅបង្អួចរបស់អ្នក។ ខណៈពេលដែលអ្នកនៅ Pù Luông អ្នកប្រហែលជាចង់ដើរកម្សាន្តទៅកាន់ទឹកជ្រោះ ឬចូលរួមសិក្ខាសាលាយកតម្បាញជាមួយជនជាតិភាគតិចថៃ។ ពិតណាស់ ការមិនធ្វើអ្វីសោះនៅកន្លែងដ៏ស្រស់ស្អាតក៏ជាជម្រើសដ៏អស្ចារ្យមួយដែរ។

Hà Giang ល្បីល្បាញដោយសារទន្លេ Nho Quế ដ៏អស្ចារ្យ ផ្លូវច្រកភ្នំ panorama ទីផ្សារជនជាតិភាគតិចដ៏អ៊ូអរ និងពិធីបុណ្យផ្កាបាក់វីតក្នុងខែវិច្ឆិកា។ នៅក្បែរជួរភ្នំដ៏ប្រណីត បណ្តាភ្នំផ្កាបាក់វីតដែលកំពុងរីកស្កុសស្កាយទាំងនេះ គឺជាទស្សនីយភាពដ៏ស្រស់ស្អាតបំផុតមួយរបស់វៀតណាម។ អ្នកមិនដែលរៀបចំកាតមេម៉ូរីកាមេរ៉ាច្រើនពេកទេសម្រាប់ដំណើរកម្សាន្តនៅ Hà Giang។ 

សម្រាប់បុណ្យគ្រិស្តស្មាសបែបតំបន់ក្ដៅ ជាមួយនឹងរលកបោកបក់ ដូងស្រស់ៗ និងខ្សាច់ម៉ត់ល្មើយ សូមដាក់បញ្ចូលកោះ Phú Quốc ទៅក្នុងផែនការធ្វើដំណើរខែធ្នូរបស់អ្នក។ ជាមួយនឹងខ្យល់អាកាសបរិសុទ្ធស្រាលៗ និងសីតុណ្ហភាពទឹកសមស្របសម្រាប់ការហែលទឹក និងមុជទឹក កោះ Phú Quốc គឺជាកន្លែងដ៏អស្ចារ្យដើម្បីប្រារព្ធពិធីបុណ្យឈប់សម្រាកជាមួយមនុស្សជាទីស្រឡាញ់របស់អ្នក។ ទស្សនាថ្ងៃលិចពណ៌ស្វាយដ៏ល្បីល្បាញរបស់កោះនេះ -- វិធីដ៏ល្អឥតខ្ចោះដើម្បីបញ្ចប់ឆ្នាំ។ 

ចង់បានគំនិតធ្វើដំណើរនៅវៀតណាមបន្ថែមទៀត? ចុះឈ្មោះសម្រាប់ព្រឹត្តិបត្រព័ត៌មានរបស់យើង ដើម្បីទទួលបានអត្ថបទល្អៗបំផុតរបស់យើងនៅក្នុងប្រអប់សំបុត្ររបស់អ្នក។