ໄປທ່ຽວໃສດີຢູ່ຫວຽດນາມ: ຄູ່ມືປະຈຳເດືອນ

ເລີ່ມຕົ້ນປີໃໝ່ດ້ວຍການແລ່ນມາລາທອນອັນຍິ່ງໃຫຍ່ໃນ ໂມກເຈົາ (Mộc Châu). ໃນເດືອນມັງກອນ, ເມືອງເທິງພູແຫ່ງນີ້ຈະກາຍເປັນດິນແດນແຫ່ງເທບນິຍາຍທີ່ປົກຄຸມດ້ວຍດອກບ໊ວຍສີຂາວ. ການແລ່ນ ຫວຽດນາມ ເທຣລ ມາລາທອນ (Vietnam Trail Marathon) ຈະແລ່ນເລິກເຂົ້າໄປໃນພູເຂົາ, ຜ່ານສວນຊາທີ່ເປັນລະບຽບ ແລະ ສວນໄມ້ໃຫ້ຜົນທີ່ກຳລັງອອກດອກ. ພັກຢູ່ ໂຮມສະເຕຂອງຊົນເຜົ່າ ເພື່ອຮຽນຮູ້ເພີ່ມເຕີມກ່ຽວກັບວິຖີຊີວິດຂອງຄົນທ້ອງຖິ່ນ ແລະ ຮ່ວມຮັບປະທານອາຫານເຮືອນທີ່ແຊບຊ້ອຍ. 

ລະດູໃບໄມ້ຜົ່ງ ໝາຍເຖິງດອກໄມ້ກຳລັງບານສະພຣັ່ງໃນ ດາລາດ (Đà Lạt). ດອກຊາກຸຣະສີຊົມພູ ເບີກບານຕາມທ້ອງຖະໜົນ ແລະ ທະເລສາບ ໃນເຂດໄຮ່ໂນນສູງ ຕາຍງວຽນ (Central Highlands). Đà Lạt ມີລົມພັດເຢັນສະບາຍ ແລະ ອາກາດເຢັນຕະຫຼອດປີ, ແຕ່ທ້ອງຟ້າໃນເດືອນກຸມພາແມ່ນແຈ່ມໃສ ແລະ ຟ້າໃສທີ່ສຸດ. ດື່ມດ່ຳກັບທຳມະຊາດ ແລະ ໃຊ້ເວລາໜຶ່ງຄືນຕັ້ງແຄັມທີ່ທະເລສາບ ຕວ່ຽນເລິມ (Tuyền Lâm), ຫຼື ໄປປິກນິກໃນເວລາກາງເວັນຢູ່ໂນນພູ ທຽນຟຸກດຶກ (Thiên Phúc Đức). 

ຫຼັງຈາກຝົນຕົກຫຼາຍເດືອນ, ຮອຍອານ (Hội An) ກໍສົດຊື່ນກວ່າທີ່ເຄີຍໃນຕົ້ນເດືອນມີນາ. ລົມພັດເຢັນໆ ແລະ ມື້ທີ່ມີແສງແດດເຮັດໃຫ້ການສຳຫຼວດທົ່ງນາ ແລະ ເມືອງເກົ່າເປັນຄວາມເພີດເພີນ. ຍ່າງຜ່ານຊອຍສີເຫຼືອງ, ຜ່ອນຄາຍໃນຮ້ານຊາ, ຫຼື ຂີ່ລົດຖີບໄປຫາຊາຍຮາດ. ຖ້າທ່ານມາຮອດໃນຄືນວັນເພັງ, ໃຫ້ໄປຍ່າງເລາະຕາມແຄມແມ່ໜ້ຳ ທູໂບ່ນ (Thu Bồn) ຫຼັງຈາກຄ່ຳມອດ ເພື່ອຊົມແສງສະທ້ອນອັນມີເສໜ່ຂອງດວງຈັນ ແລະ ໂຄມໄຟເທິງຜິວນ້ຳ. 

ງານບຸນ ເຫວ້ (Huế Festival) ແລະ ງານບຸນຫັດຖະກຳ ເຫວ້ (Huế Craft Festival) ອັນໜ້າຕື່ນຕາຕື່ນໃຈ ຈະຈັດຂຶ້ນສະຫຼັບກັນໃນທຸກໆປີໃນທ້າຍເດືອນເມສາ, ເຮັດໃຫ້ຊ່ວງເວລານີ້ເປັນເວລາທີ່ດີເລີດໃນການຢ້ຽມຢາມອະດີດເມືອງຫຼວງຈັກກະພັດຂອງຫວຽດນາມ. ກິດຈະກຳຂອງງານບຸນແມ່ນສະເຫຼີມສະຫຼອງສິລະປະ, ວັດທະນະທຳ, ແລະ ມໍລະດົກຂອງ ເຫວ້ (Huế) ດ້ວຍການສະແດງອັນຕາຕະລຶງ. ເດືອນເມສາຍັງເປັນເດືອນທີ່ສົມບູນແບບດ້ານອາກາດສຳລັບ Huế, ດ້ວຍແສງແດດ ແລະ ທ້ອງຟ້າທີ່ແຈ່ມໃສ.

ການແຂ່ງຂັນໄຕກິລາປະຈຳປີທີ່ຈັດຂຶ້ນທ່າມກາງສາກຫຼັງອັນງົດງາມຂອງທິວທັດຊາຍຝັ່ງທະເລ, ອາຍຣອນແມນ ຫວຽດນາມ (Ironman Vietnam) ຕ້ອນຮັບນັກກິລາ ແລະ ນັກທ່ອງທ່ຽວໃນທຸກໆເດືອນພຶດສະພາຢູ່ ນະຄອນ ດານັງ (Đà Nẵng). ຜ່ອນຄາຍຫຼັງຈາກຈົບງານດ້ວຍການໄປຢ້ຽມຢາມ ໂບຮານສະຖານ ໝີເຊີນ (Mỹ Sơn Sanctuary) ແລະ ພິພິທະພັນປະຕິມາກຳຈາມ (Cham Museum of Sculpture) ເພື່ອຮຽນຮູ້ກ່ຽວກັບອານາຈັກຈຳປາໂບຮານ, ຫຼື ຢູ່ຕໍ່ເພື່ອຊົມງານບຸນດອກໄມ້ໄຟອັນຕາຕະລຶງໃນເດືອນມິຖຸນາ. 

ລະດູຮ້ອນໃນ ອ່າວ ຮາລອງ (Hạ Long Bay) ໝາຍເຖິງການອາບແດດຢູ່ເທິງດາດຟ້າເຮືອສຳລານ, ລອຍນ້ຳໃກ້ເກາະຫີນປູນ, ແລະ ອີ່ມອຳກັບທອດມັນປາມຶກເຮັດໃໝ່ໆ. ພັກຜ່ອນຈາກແສງແດດ ແລ້ວໄປຊົມຫີນງອກຫີນຍ້ອຍອາຍຸພັນປີຢ່າງໃກ້ຊິດໃນຖ້ຳຫຼາຍແຫ່ງຂອງ Hạ Long. ການຂີ່ເຮືອບິນນ້ຳຈະໃຫ້ທ່ານໄດ້ຊົມທິວທັດມຸມສູງອັນອັດສະຈັນຂອງອ່າວທີ່ມີຊື່ສຽງ, ໝູ່ບ້ານລອຍນ້ຳ, ແລະ ພູຫີນປູນອັນຕາຕະລຶງ. 

ຊາຍຮາດໃນພາກກາງຂອງຫວຽດນາມແມ່ນດິນແດນໃນຝັນໃນເດືອນກໍລະກົດທີ່ມີແສງແດດ, ດ້ວຍທ້ອງຟ້າສີຟ້າໃສ, ຜິວນ້ຳປະກາຍຍິບຍັບ, ແລະ ຝັ່ງຊາຍອຸ່ນໆ. ຂີ່ລົດໄຟ ແລະ ມຸ່ງໜ້າສູ່ ຍາຈາງ (Nha Trang) ສຳລັບການພັກຜ່ອນແຄມຮາດຊາຍທີ່ສະດວກ ແລະ ໄວວາ. ການທ່ຽວຊົມເກາະຕ່າງໆຢູ່ທີ່ນີ້ແມ່ນສິ່ງທີ່ບໍ່ຄວນພາດ, ດ້ວຍແນວປະກາລັງທີ່ໄດ້ຮັບການຄຸ້ມຄອງ ແລະ ຊາຍຮາດອັນຝັນຟ້າ. ອາບໂຄລນອຸດົມດ້ວຍແຮ່ທາດ ກ່ອນຈະອອກໄປຮັບປະທານອາຫານທະເລໃນເວລາມື້ແລງຢູ່ແຄມມະຫາສະໝຸດ. 

ນາຂັ້ນໄດຂອງ ຊາປາ (Sa Pa) ເຜີຍໂສມອາພອນສີທອງອັນຕາຕະລຶງໃນເດືອນສິງຫາ, ເຊິ່ງເປັນຊ່ວງເວລາທີ່ຮວງຂ້າວໜັກອຸ້ມລຸ້ມດ້ວຍເມັດຂ້າວສຸກເຫຼືອງ. 'ລະດູສີທອງ' ນີ້ມີຝົນຝອຍໆໃນຕອນເຊົ້າໆ ແລະ ຕອນດຶກ, ແລະ ຕອນແລງທີ່ເຢັນພໍດີສຳລັບການດັງໄຟແຄັມໄຟ ແລະ ກິນໝໍ້ຮ້ອນ. ຫຼັງຈາກການຍ່າງປ່າຕະຫຼອດມື້, ຜ່ອນຄາຍຮ່າງກາຍດ້ວຍການອາບນ້ຳສະໝຸນໄພຟື້ນຟູກຳລັງ ແລະ ນອນພັກຜ່ອນຢູ່ໂຮມສະເຕຂອງຊົນເຜົ່າ.  

ລະດູໃບໄມ້ຫຼົ່ນຢູ່ ຮ່າໂນ້ຍ ແມ່ນງາມຫຼາຍ ຈົນມີບົດເພງ, ບົດກອນ, ແລະ ບົດເລື່ອງສັ້ນຂອງຫວຽດນາມ ນັບບໍ່ຖ້ວນທີ່ຂຽນກ່ຽວກັບເມືອງຫຼວງໃນລະດູການນີ້. ຂີ່ລົດຊິກໂລເລາະອ້ອມເຂດເມືອງເກົ່າ, ຄົ້ນຫາຮ້ານກາເຟທີ່ຊ່ອນຢູ່ໃນວິລາສະໄຕລ໌ຝຣັ່ງ, ຫຼື ຍ່າງເລາະກາງໃບໄມ້ຫຼົ່ນ. ຮ່າໂນ້ຍ ຍັງເປັນບ່ອນທີ່ດີເລີດໃນການສະຫຼອງວັນຊາດໃນວັນທີ 2 ກັນຍາ, ໂດຍມີທຸງຊາດປິວສະບັດໄປຕາມທຸກເສັ້ນທາງ. 

ປູ່ເລືອງ ໃນເດືອນຕຸລາ ແມ່ນທາງເລືອກທີ່ດີເລີດ ຖ້າທ່ານເປັນຜູ້ທີ່ມັກວິວທິວທັດອັນຂຽວສົດງົດງາມ ແລະ ການພັກຜ່ອນທ່າມກາງທຳມະຊາດ. ຈອງທີ່ພັກໃນເຮືອນເສົາຮົ້ວທີ່ຫັນໜ້າໃສ່ຮ່ອມພູ, ແລະ ຕື່ນນອນມາພົບກັບນາຂັ້ນໄດທີ່ຫອມກິ່ນຮວງເຂົ້າຢູ່ທາງນອກປ່ອງຢ້ຽມຂອງທ່ານ. ໃນຂະນະທີ່ທ່ານຢູ່ ປູ່ເລືອງ ທ່ານອາດຈະຢາກໄປຍ່າງປ່າຊົມນ້ຳຕົກຕາດ, ຫຼື ເຂົ້າຮ່ວມເວີກຊັອບການຕຳແຜ່ນແພກັບຊົນເຜົ່າໄທ. ແນ່ນອນວ່າ ການບໍ່ເຮັດຫຍັງເລີຍໃນສະຖານທີ່ທີ່ສວຍງາມກໍເປັນທາງເລືອກທີ່ດີເລີດຄືກັນ.

ຮ່າຢາງ ມີຊື່ສຽງຍ້ອນແມ່່ນ້ຳ Nho Quế ອັນຕາຕະລຶງ, ຊ່ອງເຂົາທີ່ມີວິວພາໂນຣາມາ, ຕະຫຼາດຊົນເຜົ່າທີ່ຄຶກຄື້ນ, ແລະ ເທດສະການດອກບັກວີດໃນເດືອນພະຈິກ. ຢູ່ຄຽງຂ້າງກັບພູເຂົາອັນຊັນ, ເນີນພູດອກບັກວີດທີ່ບານສະພຣັ່ງເຫຼົ່ານີ້ ແມ່ນໜຶ່ງໃນທັດສະນີຍະພາບທີ່ສວຍງາມທີ່ສຸດຂອງຫວຽດນາມ. ທ່ານຈະບໍ່ມີທາງເອົາເມມໂມຣີກາດສຳລັບກ້ອງຖ່າຍຮູບໄປຫຼາຍເກີນໄປຢ່າງແນ່ນອນໃນທຣິບການເດີນທາງໄປ ຮ່າຢາງ. 

ສຳລັບຄຣິດສະມາດເຂດຮ້ອນທີ່ມີສຽງຄື້ນຊັດຝັ່ງ, ໝາກພ້າວສົດ, ແລະ ຫາາດທະເລຊາຍເນື້ອລະອຽດ, ໃຫ້ເພີ່ມ ເກາະ ຟູ໋ກວົກ ເຂົ້າໃນແຜນການເດີນທາງເດືອນທັນວາຂອງທ່ານ. ດ້ວຍລົມພັດເຢັນສະບາຍ ແລະ ອຸນຫະພູມນ້ຳທີ່ເໝາະສົມສຳລັບການລອຍນ້ຳ ແລະ ດຳນ້ຳ, ຟູ໋ກວົກ ເປັນບ່ອນທີ່ດີເລີດໃນການສະຫຼອງວັນພັກກັບຄົນທີ່ທ່ານຮັກ. ຊົມວັນອາທິດອັດສະດົງສີມ່ວງທີ່ມີຊື່ສຽງຂອງເກາະ -- ວິທີທີ່ສົມບູນແບບໃນການສົ່ງທ້າຍປີ. 

ຕ້ອງການໄອເດຍການທ່ອງທ່ຽວຫວຽດນາມເພີ່ມເຕີມບໍ? ລົງທະບຽນຮັບຈົດໝາຍຂ່າວຂອງພວກເຮົາ ເພື່ອຮັບເລື່ອງราวທີ່ດີທີ່ສຸດຂອງພວກເຮົາໃນກ່ອງຈົດໝາຍຂອງທ່ານ.