គោលដៅទេសចរណ៍ក្នុងប្រទេសវៀតណាមសម្រាប់ព្យាបាលផ្លូវចិត្ត

 

ដាឡាត

 

អាកាសធាតុស្រស់ស្រាយ និងប្រកបដោយភាពរីករាយ រួមជាមួយនឹងធម្មជាតិដ៏ស្រស់ស្អាតដូចគំនូរ ប្រជាជនរាក់ទាក់ និងរបៀបរស់នៅបែបយឺតៗ។ អ្វីៗគ្រប់យ៉ាងនៅទីនេះដក់ជាប់ក្នុងចិត្តមនុស្ស ខណៈដែលពួកគេត្រូវបានផ្តាច់ចេញទាំងស្រុងពីភាពប្រញាប់ប្រញាល់ និងភាពអ៊ូអរនៃទីក្រុងធំៗ។ ដូច្នេះ ប្រសិនបើអ្នកប្រាថ្នាចង់រីករាយជាមួយអារម្មណ៍នៃភាពស្ងប់ស្ងាត់ និងសន្តិភាព ទីក្រុងដាឡាតនៅទីនេះដើម្បីស្វាគមន៍អ្នក។ ដាឡាតក៏ជាគោលដៅទេសចរណ៍សម្រាប់គេចចេញពីរដូវក្តៅដ៏ក្តៅគគុកនៃប្រទេសវៀតណាម ដែលភ្ញៀវទេសចរអាចរីករាយជាមួយការព្យាបាលស្ប៉ាកម្រិតសព្វ និងផលិតផល «ពីចម្ការមកកាន់តុអាហារ» ដូចជា កាហ្វេ តែអាទីឆូ ផ្លែស្ត្រប៊ែរី...

ហូយអាន

ពន្លឺចាំងផ្លេកពណ៌លឿងទុំនៃចង្កៀងគោមពាសពេញទីក្រុងបុរាណហូយអាននៅពេលរាត្រី រួមជាមួយនឹងស្ថាបត្យកម្មបុរាណ ត្រូវបានចាត់ទុកថាជាចំណុចពិសេសដ៏ទាក់ទាញ ដែលជួយព្យាបាល និងសម្រាលភាពនឿយហត់របស់ភ្ញៀវទេសចរ។ ហូយអានជាទីក្រុងមួយក្នុងចំណោមទីក្រុងស្អាតបំផុតក្នុងពិភពលោកក្នុងឆ្នាំ ២០២៤ យោងតាមទស្សនាវដ្តី Travel & Leisure ហើយទីនេះមានរីសតជាច្រើនដែលមានបរិយាកាសស្ងប់ស្ងាត់សម្រាប់ភ្ញៀវទេសចរទាំងលំហែកាយ ដូចជាការទស្សនាទន្លេធូបោន (Thu Bon) នៅពេលថ្ងៃរះ និងទាំងការហាត់ពត់ផ្លូវចិត្ត (mindfulness) ដូចជា យូហ្គា ការតាំងសមាធិ ពិធីឆុងតែ និងការម៉ាស៊ីសម្រួលអារម្មណ៍នៅតាមស្ប៉ា។

ម៉ុកចាវ

ស្ថិតនៅកណ្តាលភ្នំ និងព្រៃឈើធម្មជាតិ ម៉ុកចាវមានអាកាសធាតុត្រជាក់ស្រួល រួមជាមួយកូនភ្នំតែដ៏ស្រស់បំព្រង ធ្វើឱ្យទីនេះក្លាយជាគោលដៅលំហែព្យាបាលផ្លូវចិត្តដ៏មានប្រសិទ្ធភាព ដែលត្រូវបានជ្រើសរើសដោយយុវជនជាច្រើន។ ទីនេះជាជម្រកនៃជនជាតិភាគតិចជាច្រើន ដែលផ្តល់ឱកាសឱ្យអ្នកបានបទពិសោធពីសម្រស់វប្បធម៌ដ៏ប្លែក និងស្រស់ស្រាយ។ លើសពីនេះ អ្នកអាចកោតសរសើរនូវទស្សនីយភាពធម្មជាតិដ៏ស្រស់ស្អាតនៃម៉ុកចាវ ដកដង្ហើមយកខ្យល់អាកាសបរិសុទ្ធលើភ្នំ និងរីករាយជាមួយភាពស្ងប់ស្ងាត់នៃជីវិតដើម្បីកាត់បន្ថយភាពតានតឹងផ្លូវចិត្ត។

និញបិញ

ដោយនាំមកនូវលក្ខណៈពិសេសនៃតំបន់ជនបទភាគខាងជើង និញបិញទាក់ទាញភ្ញៀវទេសចរតាមរយៈភាពសាមញ្ញ និងសម្រស់ធម្មជាតិ។ ភ្នំកំបោរដ៏ប្លែក ទន្លេដ៏ស្ងប់ស្ងាត់ និងភូមិប្រពៃណីនៅក្នុងខេត្តនិញបិញ បង្កើតបានជាបរិយាកាសដ៏ល្អឥតខ្ចោះសម្រាប់ដំណើរលំហែថែទាំសុខភាព។ អង្គុយពិសាតែជូរក្តៅមួយពែង បណ្តោយអារម្មណ៍ក្នុងព្រឹកព្រលឹមដ៏ស្រស់ស្រាយ ក្រោមម្លប់ឈើបៃតង សម្រាកកាយ និងទស្សនាចរន្តទឹកហូរនៃទន្លេង៉ូដុង (Ngo Dong)។

ភូក្វុក

ជាកោះដ៏ស្អាតបំផុតនៅលើពិភពលោកក្នុងឆ្នាំ ២០២៤ យោងតាមទស្សនាវដ្តី Travel & Leisure ភូក្វុកត្រូវបានគេប្រសិទ្ធនាមថាជាឋានសួគ៌នៃលំហែថែទាំសុខភាពនៃប្រទេសវៀតណាម។ «កោះគុជ» (Pearl Island) ផ្តល់ជូននូវសកម្មភាពសុខុមាលភាពយ៉ាងច្រើនសន្ធឹកសន្ធាប់ដើម្បីលើកកម្ពស់សុខភាពកាយសម្បទារបស់អ្នកនៅក្នុងរីសតកម្រិត ៥ ផ្កា ដូចជា ការតាំងសមាធិ យូហ្គា និងការម៉ាស៊ីបញ្ចេញជាតិពុល (detox massage)។ ការរីករាយជាមួយវិស្សមកាលរបស់អ្នកក្នុងចំណោមឆ្នេរសមុទ្រទឹកខៀវស្រងាត់ និងខ្យល់អាកាសបរិសុទ្ធនៃកោះភូក្វុក នឹងនាំមកជូនភ្ញៀវទេសចរនូវអារម្មណ៍ទទួលបានការស្ដារឡើងវិញនូវកម្លាំងកាយចិត្ត។

ដំណើរលំហែថែទាំសុខភាពមិនត្រឹមតែកម្រិតត្រឹមតែការសម្រាកកាយប៉ុណ្ណោះទេ ប៉ុន្តែថែមទាំងជួយឱ្យភ្ញៀវទេសចរបានរុករក និងរៀនសូត្រពីទំនៀមទម្លាប់ និងវប្បធម៌ថ្មីៗនៅគោលដៅទេសចរណ៍ នាំមកនូវការផ្លាស់ប្តូរវិជ្ជមានក្នុងជីវិត។ ទស្សនីយភាពដ៏ស្រស់ស្អាត ទីកន្លែងស្ងប់ស្ងាត់ បទពិសោធន៍ដ៏សមស្រប និងអ្វីៗជាច្រើនទៀត គឺជាអ្វីទាំងអស់ដែលអ្នកត្រូវការដើម្បីធ្វើឱ្យព្រលឹងរបស់អ្នកស្រស់ស្រាយ និងបណ្តុះស្មារតីដើម្បីជីវិតកាន់តែប្រសើរ។